Дарога з Берасця ў Белавежскую пушчу будзе выключана з памежнай зоны.
Згодна прапановы, якая была накіравана прадстаўніцтвам Дзяржаўнага памежнага камітэту ў Берасцейскі гарвыканкам, і там зацверджана, цяпер у Белавежскую пушчу зможа прыехаць кожны грамадзянін Беларусі без набыцця адмысловых даведак, якія патрабуюцца для знаходжання ў памежнай зоне прыезджых. Нагадаю, што выдача пропускаў на права ўезду ў памежную зону ажыццяўляецца аддзяленнем па грамадзянству і міграцыі раённых аддзелаў органаў унутраных спраў. Для гэтага па месцы жыхарства патрэбна накіраваць пісьмовую заяву з тлумачэннем мэты наведвання памежнай тэрыторыі. Адмена ж такога патрабавання для Белавежскай пушчы накіравана на прыцягненне турыстаў у гэты рэгіён.

Сёння ў судзе Маскоўскага раёна Берасця разглядалася справа Андрэя Лебянчука, каардынатара БХД па Берасці.
Андрэй у пятніцу вечарам быў спынены ДАІ на сваёй машыне, нібыта для праверкі дакументаў і далей быў накіраваны на штрафстаянку для праверкі: ці не перабіты нумары кузава машыны. Далей Андрэя накіравалі ў ізалятар часовага ўтрымання па вуліцы Багданчука.
Сёння на судзе хлопец даведаўся, што на яго складзеная справа за брыдкаслоўе на супрацоўніка ДАІ.
Пад час разгляду справы ў суддзі ўзнікла шмат пытанняў наконт складання пратакола і адсутнасці подпісаў затрыманага на гэтых дакументах, таму было вырашана справу накіраваць на дапрацоўку, а Андрэй выпушчаны на свабоду.
Сам Андрэй лічыць, што быў проста дадзены загад наконт яго затрымання, а ў такім выпадку падставу лёгка знайсці, мабыць хацелі каб ён не трапіў на "Чарнобыльскі шлях", хоць і сам Андрэй туды не планаваў ехаць, а збіраўся на Вялікдзень наведаць бацькоў.

24 красавіка ў Берасці на даху iнструментальнага цэха электралямпавага завода адбылося ўзгаранне.
У тушэннi было задзейнiчана шэсць пажарных разлiкаў, якiм спатрэбiлася 17 хвiлiн, каб лакалiзаваць агонь. Згарэлi старыя рулоны руберойду, якiя знялi з даху падчас рамонту. Людзi не пацярпелi i прадпрыемству ўрон не нанесены. Па папярэдняй версii, прычынай стала парушэнне тэхнiкi бяспекi.

За здзек з саслужбоўца сяржант тэрміновай службы атрымаў тры гады пазбаўлення волі.
У батальёне радыёэлектроннай барацьбы, што змешчаны ў Берасці на "Чырвоным двары", да стараслужачага падышоў яго аднагодка з пытаннем: ці забіраў днявальны у маладых ежу, дасланую бацькамі? І калі забіраў - дзе яна? Той даў адмоўны адказ. Не паверыўшы, сяржант пачаў наносіць таварышу ўдары па твары, затым запіхнуў у бытоўку, разадраў у ахвяры адзежу на грудзі, узяў ўключаны прас і прыпёк ім калегу. У выніку - тэрмічны апёк грудной клеткі.
Па словах суддзі Берасцейскага міжгарнізоннага вайсковага суду Эдуарда Каспяровіча, звычайна саслужбоўцы прабачаюць адзін аднаго і падчас суду просяць моцна не караць абвінавачаных. У гэтым выпадку пацярпелы заклікаў пакараць крыўдніка па ўсёй строгасці, бо зараз, як сказаў ён, адбітак ад войска застанецца ў яго на ўсё жыццё.
Акрамя таго, скалечаны жаўнер запатрабаваў спагнаць з крыўдніка 4 мільёны рублёў. Суд задаволіў просьбу, праўда, зменшыўшы суму да аднаго мільёна, каля 450 даляраў. Сам жа крыўднік, прызнаны псіхічна здаровым, хутка адправіцца ў калонію ўзмоцненага рэжыму, дзе правядзе тры гады свайго жыцця.

Сучасны смеццеперапрацоўчы завод, які ў хуткім часам мяркуецца пабудаваць у Берасці, будзе ўтылізаваць не толькі цвёрдыя побытавыя адыходы, але і ападкі сцёкавых вод, а таксама глей, які перапаўняе вычышчальныя збудаванні горада.
Аб гэтым падчас візіту на Берасцейшчыну заявіў міністр прыродных рэсурсаў і аховы навакольнага асяроддзя Беларусі Лявонцій Харужык. Тым самым будзе ліквідаваная пагроза экалагічнай катастрофы ў пойме Буга. Меркаваны кошт праекту — ад 60 мільёнаў даляраў да 60 мільёнаў эўра. Па словах міністра, да выкарыстання гэтых грошай трэба падысці ўзважана і абачліва. Бо сам завод будзе ўяўляць з сябе таксама вельмі складаны і патэнцыйна небяспечны ў экалагічным плане аб'ект. У яго ўзвядзенні паўдзельнічае нямецкая фірма «Ліндзе КСА».

Сёлета горад над Бугам чакае шмат прыемных змен.
Напрыклад, у год 50-гадовага юбілею найстарэйшы берасцейскі гатэль “Буг” чакае рэканструкцыя. У гатэлі не проста зробяць асвяжальны рамонт і заменяць перакрыцці, але цалкам зменяць дызайн рэстарана і нумароў.
Дарэчы, у адным з нумароў гэтага гатэлю ў пачатку 70-х гадоў мінулага стагоддзя спыняўся Ўладзімір Высоцкі. Рэканструкцыя, кажуць адмыслоўцы, патрэбна як паветра: “Буг” адкрыў дзверы для пастаяльцаў яшчэ ў 1958 годзе.
Заўважыць змены можна будзе яшчэ і на цэнтральным чыгуначным вакзале. Там сёлета пачалася рэканструкцыя, і да канца восені тут плануюцца пуцявыя працы, замена каналізацыі, а таксама будаўніцтва тунэлю. Праект прадугледжвае практычна поўную рэканструкцыю з захаваннем гістарычнай каштоўнасці самога вакзалу, будынак якога пабудавалі яшчэ ў 1886 году. Акрамя таго, Берасце плануюць засадзіць дрэвамі. На вуліцах горада ўжо высаджана больш за тысячу дрэў. Сярод парод прафесіяналы спынілі свой выбар на ясені, таполі, чаромсе, клёне і ліпе. Пасадка зялёных насаджэнняў працягваецца.

У ноч з 21 на 22 красавіка ў Кобрыне затрыманыя два маладафронтаўца за графіці на сценах.
Аляксандр Фамічоў і Ўладзімір Сучок малявалі на прыпынках графіці "Свабоду Казулину!", "Малады фронт". У 2.23 іх затрымалі побач з аўтобусным прыпынкам "Універмаг". Міліцыянты пачалі фатаграфаваць месца здарэння на мабільны тэлефон.
Па словах затрыманых, ім прапанавалі прыбраць надпісы, у адваротным выпадку, калі ў міліцыю патэлефануюць гаспадары шапіка, у іх могуць узнікнуць праблемы.
Хлопцаў, негледзячы на позні час, прыйшлі падтрымаць амаль усе актывісты Маладога Фронту. Калі яны зашлі ў РАУС, каб даведацца, калі вызваляць затрыманых, то ўбачылі, што маладафронтаўцаў дапытваюць проста ў дзяжурнай частцы. Міліцыянты паведамілі, што іх пратрымаюць яшчэ каля двух гадзін, аднак, калі зразумелі, што іх будуць чакаць, амаль адразу адпусцілі. Хлопцы прабылі ў РАЎС крыху больш за гадзіну.

У 2008 годзе Пінскі гарадскі парк культуры і адпачынку адзначыць сваё 150-годдзе. У юбілейным годзе ў найстарэйшым аб'екце культуры і адпачынку пачнецца маштабная рэканструкцыя.
Рэканструкцыя пачнецца з верхняй часткі парка, дзе размешчаныя атракцыёны і гаспадарча-адміністрацыйныя пабудовы. Затым будаўнікі пяройдуць у так званую "ціхую зону". Тут, паводле архітэктурна-планавальнага задання, з'явяцца шахматна-шашачны і чытальны павільёны. Трэцяя чарга рэканструкцыі закране мемарыяльны комплекс і ўсю ніжнюю частку парка. Запланаваны таксама рамонт усіх аўтамабільных і пешаходных сцежак, новае асвятленне, усталёўку малых формаў паркавай скульптуры. Адмысловая ўвага будзе нададзена азеляненню.
У праекце першай чаргі рэканструкцыі гарадскога парка закладзена абнаўленне фантана і ўзвядзенне летняга амфітэатра на 600 пасадкавых месцаў з маляўнічым відам на раку. Старую летнюю эстраду дэмантуюць. Агульная сума капіталаўкладанняў у маштабную юбілейную рэканструкцыю парка - амаль 4 млрд.рублёў. Пакуль праект першай чаргі праходзіць дзяржаўную экспертызу ў парку рыхтуюцца да адкрыцця летняга сезону 2008. Афіцыйнае адкрыццё юбілейнага сезону адбудзецца ў Светлую Хрыстову Нядзелю.

Вопытны рыбгас “Сялец”, які знаходзіцца ў Бярозаўскім раёне Берасцейскай вобласці, сёлета ўпершыню прапаноўвае элітную рыбалку.
Любы жадаючы можа за 100 тысяч рублёў парыбачыць з вудай на адным з вадаёмаў рыбгаса, зарыбленым фарэллю і асетром. Акрамя таго, прапаноўваецца рыбалка на сама да 15 кг вагай, а таксама буйнога карпа, белага амура, шчупака.

У інвалідаў Пінска з'явіўся свой транспартны графік.
Нядаўна на таблічках з раскладам руху аўтобусаў па вуліцах Пінска з'явіліся падкрэсленыя шырокай паласой гадзіны і хвіліны: так пазначаецца час прыбыцця на прыпынак нізкапольных аўтобусаў МАЗ–7. Гэтыя машыны адмыслова абсталяваныя для інвалідаў. У салоне ёсць і прынады для замацавання калясак. Пакуль такія аўтобусы толькі на 11–м гарадскім маршруце, але неўзабаве з'явяцца і на іншых.
— Людзям з абмежаванымі магчымасцямі вельмі важна ведаць дакладны час, калі яны могуць скарыстацца зручным транспартам. Таму мы і паказалі яго на агульным раскладзе. Як толькі набудзем яшчэ такія аўтобусы, тое ж самае зробім і на новых рэйсавых маршрутах, — дзеліцца планамі дырэктар пінскага аўтобуснага парка № 3 Ананій Хвасцюк.
Дарэчы, нізкапольныя аўтобусы — не рэдкасць на вуліцах беларускіх гарадоў. Але паказваць час іх прыбыцця на прыпынак здагадаліся пакуль толькі ў Пінску. Чаму б і іншым не запазычыць гэты досвед?

Што пераўтварае безаблiчнае i сумнаватае паняцце "геаграфiчная тэрыторыя" ў пазнавальны, адметны край, краiну, якую мы называем сваёй Бацькаўшчынай i якую з цеплынёй згадваем, асаблiва ад`ехаўшы за яе межы? Вiдаць, у кожнага будзе свой адказ на гэтае пытанне.
Але наўрад цi абмiнем мы тое, што пакiдалi нам у спадчыну многiя (i вельмi розныя!) пакаленнi беларусаў. Адны з iх будавалi храмы i прыгожыя палацы, другiя — разбуралi, каб увекавечыць iншыя часы i iншыя iдэалы. Дзецi i ўнукi тых, хто цягаў цаглiны з парушанай царквы на будаўнiцтва ўласнага склепа, сёння зачаравана замiраюць перад iмклiвымi зводамi старадаўняга касцёла цi ўтульнай прадуманасцю i трываласцю сядзiбы знакамiтага роду. Гэта ўсё — i набыткi, i разбурэннi, у тым лiку i свядомасцi, — наша спадчына, наша самасцвярджэнне як нацыi. I рыштаваннi над рэшткамi, часам над руiнамi калiсьцi велiчных пабудоў — цi не самы лепшы сiмвал вяртання да той краiны, якую доўга i цяжка будавалi нашы вельмi розныя продкi з адною мэтаю — пакiнуць яе нам, сваiм наступнiкам, не распылiцца ў гiсторыi, не застацца безназоўнымi. Будуем Беларусь, Бацькаўшчыну, памятаючы ўсiх, хто складаў яе гонар, хто хацеў бачыць лепшай у свеце.

На міжнародным Беларуска-Польска-Украінскім турніры па міні-футболе берасцейская каманда "Пагоня" заняла 4-е месца.
Турнір, удзел у якім бралі каманды моладзевых арганізацый з Берасцейшчыны, Валыні, і Любліншчыны праходзіў 12-13 красавіка ў Луцку. Берасце прадстаўляла "Пагоня" - зборная каманда з актывістаў Руху "За Свабоду", Партыі БНФ, "Дзедзіча" і шэрагу іншых арганізацый горада.
У першы дзень спаборніцтваў "Пагоня" выступіла упэўнена, выйграла ўсе матчы і выйшла ў фінальную частку турніра. У гульнях за прызавыя месцы "Пагоне" супрацьстаялі моцныя супернікі. Сказалася стомленасць берасцейцаў ад першага дню, і як вынік - пачэснае 4 месца. А пераможцам стала каманда "Перетворення" суполкі пратэстантаў Луцка.
Па словах капітана "Пагоні", Старшыні Берасцейскай гарадской арганізацыі Партыі БНФ сп. Я. Бяласіна, паездка на турнір прынесла плён не толькі ў спартовым плане.
- Падчас візіту мы правялі шэраг сустрэч з прадстаўнікамі грамадскіх арганізацый, палітычных партый, мясцовых уладаў Луцка. Гутаркі вяліся пра магчымасць правядзення супольных культурніцкіх, спартовых і грамадскіх мерапрыемстваў. Упэўнены, што пасля гэтага турніру кантакты паміж дэмакратычнымі арганізацыямі нашых рэгіёнаў стануць больш шчыльнымі.
Турнір быў арганізаваны аддзелам па справах сям'і і моладзі Луцкай гарадской рады.

Сербы хацелi уўзяць у арэнду 50 тысяч гектараў зямлi ў Баранавiцкiм раёне.
Замежныя фiрмы праяўляюць пэўную цiкавасць да нашых сельгасугоддзяў i хацелi б узяць у доўгатэрмiновую арэнду зямлю. А ў некаторых раёнах Беларусi дзелавыя людзi ўжо i арандуюць нашы былыя сельгаскааператывы. Напрыклад, у Ляхавiцкiм раёне поўным ходам iдзе ўзвядзенне свiнакомплексу датчанамi.
Тое, што прапанавала фiрма "МК-груп", не магло не здзiвiць. Сербы хацелi б узяць у арэнду 50 тыс. гектараў зямлi, каб на ёй сеяць i жаць. А ў раёне ворыва ўсяго 64,9 тысячы. Здавалася б, ідэальнае выйсце: аддаць зямлю сербам i няхай у iх балiць галава наконт тэхнiкi, палiва, угнаенняў i цэнтнераў, сабраных з гектара. Пачуўшы, што такой колькасцi зямлi ў раёне не атрымаць, сербы заявiлi, што можна было б спынiцца i на 20 тыс. гектараў, але гэта — мiнiмум, бо калi зямлi будзе меней, то не ўдасца поўнасцю загрузiць элеватар, якi фiрма ў такiх выпадках узводзiць да свайго збожжа.